KITTY A TRUE YES BUT U HYPE TUH

with Miss Kitty

Mi no know if a sumting inna black people or should I say Jamaican people DNA wah mek we can hype pon we one a nedda so all when nutten naah gwaan and there is no need fi hype.

Mi no sure a wah mek sum Jamaican boasy lacka bed chink so because as a likkle ting start turn fi dem dem start walk like puss pon hot brick and waa ‘belickle’ everybody.

When dem ready fi hype all hype haffi a cuss dem an a ask dem a weh dem a gwaan so fah! Especially when it come to business place and providing service, we are not oriented like dat. Our culture seh we fi be boss an boss up everybody all when we dunce like bat!

Yuh see sum people bawl fi jobs, jobs and more jobs yet when dem get it dem treat dem fellow black man so bad yuh haffi wonda if dem white. Dem skin up dem face and very ill-mannered when it comes to being polite because dem waa show a who in charge.

Di hot part bout all a it is when dem hype a road nuff a dem no have no talk a dem yaad! As a matter a fact dem no run dem yaad dem run roun dem yaad! From some a dem open dem bung-shell yuh know seh a because empty barrel mek di most noise an dem jus a mek themself look bad because anybody who have sense can see through the façade.

When it come to business mi wonda if some people really undastand seh each customer count and without customers dem bizniz non-existent. Smaddy go a one hardware store inna di rain fi go look one likkle item and was turned away because according to di mampala man him bizniz place lock. True him Prado park up outside an him have likkle gold roun him neck an pon him hand an it look like him a provide him worka wid sum hardware him hype and send weh di man.

Yuh tink if a did missa Chin him woulda leggo dah sale deh? Is not like di shutta did dung an anno 10 bag a cement or steel him did want. A jus’ one likkle hacksaw blade an him couldn’t turn back fi sell it an di man a explain seh a far him a come from? Mi wish mi did deh deh fi give it to him! Sometimes we don’t know who is who and in dis country we suffer and stifle we self because of stereotypes and classism. A bet seh if di man did come loud an a floss or maybe if he was caucasian him woulda get serve but true him pree seh di man no deh pon fi him level him use hype an lose a good customer!

dutty dish towel

Sometime yuh see some real ‘heavy’ people wah got it like dat and to how dem move humble yuh haffi a wonda if dem know seh dem have it. Yet yuh have di dutty dish towel dem wah tun table claat an become a pest to di table! Remnants of slavery still plague we inna 2011 caw mi cyaa see how treating my fellow country man bad or inferior is someting fi hype bout at all. Is like the field slave versus the house slave mentality still shackle some a we. No get mi wrong, sometime likkle hyping haffi gwaan caw yuh haffi mek sum people undastand demself and no true dem see yuh a move humble no tek yuh light when dem see yuh a road but as me always seh real money doan mek noise!

Sumtime yuh go some place wah black man own an to how him or she a delegate out di work and a talk pon top a dem voice yuh really haffi wonda wha tek dem. Dem no only treat customers bad all dem workers dem daaab up and yuh haffi seh bwoy life funny because di same bizniz weh a benefit dem, dem too good fi lift a straw in deh.

Big up to all the real owna dem who know seh if push come to shove yuh can tek up a broom, wipe off a table an serve a customa, put on all a wata boot and get dirty an no feel no way. Sometime if yuh see di likkle buttry weh dem a hype bout yuh laugh til yuh ketch flu! Some a dem ova dweet but mi no ramp fi put dem inna dem place because if yuh too big fi serve yuh need fi tan roun a back!

Being able to serve is an indication seh yuh feel good bout yourself and dat you are self assured and more people fi get more service oriented and come off a dem high horse an dash weh dem false pride caw nuff a dem not even have dry … (unnu dun it) inna dem … (unnu dun it) fi a galang so. Jamaica would be a better place.We cyaa expect others to treat us well wid mannas and respect if we no dweet mongst we self. We haffi set the trend so others follow.