SHORTMAN AINT NO SAINT SON(anedda pawt tudy Blake bredda saga)

Mi Tivoli linky a tell mi seh di saintly, short, extradited don, who help ‘all Jamaicans’ (in my sarcastic tone) was no saint at all, an dis yute ere well glad him empire fall. Him seh bout a year ago one a him soldiers dem did a mess roun dis yute who sell downtown. Him seh di bwoy jus tek a set pan di guy a lick him up an di yute tek it, but one day him come an start lick up di yute an den spit inna di yute face. Di guy had enuff an gi di don’s soldier one rahtid lick flat a grung an den go to di don fi go try explain wat happened between him an di soldier. Di don look pan di likkle guy an tell him seh a him wrong, an how him diss him soldier an him haffi pay di consequence cuz him cyaa have people a diss him soldiers. Met dem beat do poor guy to death. So mi linky, & I’m sure odders, well happy seh nuff a dem dead dung deh an di don inna fi him stress now.
 
Di guy also a tell mi seh a di don did arrange di killing of Willy Hagart. Him seh at di las Sashi stage show weh keep, di sound selector di big up an name out all a di dons inna di place. But Hagart wasnt havin it, an go tek di mic from di selector an seh how a him a di ongle don inna di place. Di guy seh same time di short don an him man dem lef di show an couple weeks lata Hagart dead an di res is history.
 
Di guy seh while nuff people a seh a Vivian Blake kill him owna bredda, nutten nuh go suh. Dis one yah him res right at di saintly short don’s feet. Him seh Blake bredda go dung a Tivoli an a try turn di yute dem by telling dem how dem life cudda be much betta if dem support him, an how di don a live big an dem a suffa, an how him will tek care a dem betta if dem wuk fi him. But di don’s final straw came wen him go dung deh an ask one a di yute dem wah him wudda really want as proof seh him can betta dem life, an di yute tell Blake bredda seh him wudda want a cyar. Well di yute get di cyar di nex day an shortly afta dat Blake bredda was killed cuz di don viewed him as a threat do his operation an his status as don.